ໂຊເຟີ້ຖີ້ມຜູ້ໂດຍສານຍາດເງິນໃນມືແລ້ວໜີຖີ້ມໄວ້ຢູ່ປ້ຳນ້ຳມັນ

ວັນທີ 9/9/2019 ທີ່ ນະຄອນຫຼວງວຽງຈັນ ຈາກເຟສບຸກ “Strong Euay” ໄດ້ໂພສລາຍງານວ່າ “ຂ້ອຍລະຢາກຮູ້ວ່າຄົນຂັບລົດ 2 ແຖວ​ມັນເອົາຫຍັງເຮັດໃຈ ຄັນຖືກລູກຫຼານເຂົາເຂົາຊິເຮັດແນວໃດ ຈັ່ງແມ່ນຊົ່ວ ເຫັນແກ່ເງິນໂດຍບໍ່ສົນໃຈຄວາມລຳບາກຂອງຄົນອື່ນ ເຖິງຂ້ອຍຊິໂຫດຮ້າຍກາດ ແຕ່ກະບໍ່ໄດ້ຊົ່ວເລວຊາມ. ສັງຄົມທຸກມື້ນີ້ຢູ່ຍາກຂຶ້ນເລື້ອຍໆ ຫຼັງຈາກໄປປະຊຸມກ່ຽວກັບການເຮັດໂຄງການຊ່ວຍເຫຼືອປະຊາຊົນທີ່ຖືກອຸທົກກະໄພ ລະຫວ່າງທາງກັບບ້ານ ໄດ້ເຫັນມີເດັກນ້ອຍ 2 ຄົນ​ ອາຍຸປະມານ 14-15​ ປີ​ ພາຍກະເປົາສອບສີຮຸ້ງຍ່າງຊີ້ໂດ່ ຊີ້ເດ່​ໄປໆມາໆ​ ອາບເຫື່ອອາບນ້ຳຕາຢູ່ແຄມທາງ​ ແຖວປ້ຳນ້ຳມັນຂົວຫຼວງ(ປ້ຳສີເຫຼືອງ)​,​ ຂ້ອຍກໍ່ໄດ້ເຂົ້າໄປຖາມວ່າ: ພວກໂຕຊິໄປໃສ ພວກໂຕມາແຕ່ໃສ
2 ຄົນໄດ້ຕອບວ່າ:

ເຮົາມາແຕ່ສະຫວັນນະເຂດ ບໍ່ເຄີຍມາວຽງຈັກເທື່ອ ເຮົາຊິໄປເຮັດວຽກນຳພີ່ນ້ອງຢູ່ປ້ຳນ້ຳມັນໜອງດ້ວງໃຕ້,​ ມາຮອດຄິວລົດແລ້ວຈ້າງລົດ 2 ແຖວມາ ເຮົາບອກເຂົາວ່າເຮົາຊິໄປປ້ຳນ້ຳມັນໜອງດ້ວງໃຕ້​ (ປ້ຳສີຟ້າ)​ ແລ້ວເຂົາມາສົ່ງເຮົາຢູ່ນີ້ ຮີບຍາດເງິນຢູ່ມືເຮົາແລ້ວໄລ່ເຮົາລົງ ບອກເຮົາວ່າຢູ່ນີ້ແລະ ຮອດແລ້ວ,​ ບາດເຮົາໄປຖາມພະນັກງານຢູ່ປ້ຳວ່າບໍ່ແມ່ນ ລະເຮົາກະໄຫ້ ບໍ່ຮູ້ຊິເຮັດແນວໃດ. ຂ້ອຍກະເລີຍບອກວ່າ: ໄປຂຶ້ນລົດ ເອື້ອຍຊິພາໄປສົ່ງ,​ ລະຫວ່າງຂີ່ລົດໄປ 2 ຄົນໄດ້ເວົ້າວ່າຄັນບໍ່ມີເອື້ອຍ ເຮົາ​2 ຄົນຕາຍແທ້ໆ (ທັງເວົ້າທັງໄຫ້)​ ພໍຂີ່ລົດຮອດປ້ຳໜອງດ້ວງໃຕ້ ກະເຫັນພີ່ນ້ອງຂອງເຂົາຢູ່ປ້ຳນັ້ນ ແລ້ວ​ 2 ຄົນກະຂອບໃຈຢ່າງໃຫຍ່ ພ້ອມທັງຈົກເງິນໃຫ້ຂ້ອຍ ໃບ​ 50.000​ກີບ​ໃບ1 ຂ້ອຍຕອບກັບໄປວ່າ: ບໍ່ເອົາດອກ ເອື້ອຍບໍ່ແມ່ນຮັບຈ້າງຂັບລົດ ເອື້ອຍຊ່ວຍພວກໂຕຊື່ໆ ແລ້ວຂ້ອຍກະຂີ່ລົດກັບບ້ານ”

ທີ່ມາ: Strong Euay